A parroquia de Zamáns, situada no sur do concello, aos pés dos montes do Galiñeiro, recibe o seu nome do río que a cruza. Coas cotas máis altas de todo o val do Fragoso, con 705 metros de altura, linda polo norte coas parroquias de Valadares, Beade e Bembrive, e cos concellos de Mos, o Porriño e Gondomar polo leste e sur. Segundo os datos dos censos recentes é a parroquia con menos habitantes de Vigo, con 761 veciños e veciñas.

No CONXUNTO ARQUEOLÓXICO DO CAMPUS UNIVERSITARIO, nos planaltos de Zamáns que limitan con Bembrive e o concello de Mos, atopamos diversos cemiterios de época megalítica, como son o caso dos grupos do Alto de San Cosme, Beiras Longa ou a Sobreira.

No ROTEIRO ETNOGRÁFICO DOS MUIÑOS DE ZAMÁNS, no contorno do río Vilaza, atopamos un valioso legado etnográfico que garda unha estreita relación coa auga: un conxunto de muíños con dúas pontellas e un vello lavadoiro, na actualidade parcialmente mergullado baixo as augas do encoro, desde que se inaugurou a mediados do século pasado.